ಮಾನಸಿಕ ಸಮಸ್ಯೆ ಕಾರಣ ಬಳಲುತ್ತಿರುವವರ ಬಗ್ಗೆ
ಕರ್ನಾಟಕ ಸರಕಾರದ ಹೊಸ ಆಶಾಕಿರಣ
ಪ್ರತಿ ಕುಟುಂಬ ತಿಳಿದುಕೊಳ್ಳಬೇಕಾದ ಎರಡು ಪ್ರಮುಖ ಸರ್ಕಾರಿ ಯೋಜನೆಗಳು
ಸಮಾಜದಲ್ಲಿ ಎರಡು ಬಗೆಯ ಮಾನಸಿಕ ಅಸ್ವಸ್ಥರು ಇದ್ದಾರೆ. ಒಂದು ವರ್ಗ: ಚಿಕಿತ್ಸೆ ಪಡೆದು ಮನೆಗೆ
ಮರಳಿದ್ದಾರೆ, ಆದರೆ ಸಮಾಜಕ್ಕೆ ಮರಳಲು ಆಗಿಲ್ಲ—ಏಕಾಂತ, ಕಳಂಕ, ಉದ್ಯೋಗ ಇಲ್ಲದೆ ಮತ್ತೆ
ಅನಾರೋಗ್ಯಕ್ಕೆ ಮರಳುವ ಅಪಾಯದಲ್ಲಿದ್ದಾರೆ. ಮತ್ತೊಂದು ವರ್ಗ: ಯಾರ ಕಣ್ಣಿಗೂ ಬೀಳದೆ ರೈಲು
ನಿಲ್ದಾಣ, ಬಸ್ ನಿಲ್ದಾಣ, ಬೀದಿ ಬದಿಗಳಲ್ಲಿ ಅಲೆಯುತ್ತಿದ್ದಾರೆ—ಗುರುತಿಲ್ಲದೆ, ಆಹಾರವಿಲ್ಲದೆ, ಚಿಕಿತ್ಸೆಯಿಲ್ಲದೆ
ಬಳಲು ತ್ತ ಇದ್ದಾರೆ .
ಈ ಇಬ್ಬರೂ ನಮ್ಮ ಸಮಾಜದಲ್ಲಿ ತುಂಬಾ ನಿರ್ಲಕ್ಷಿಸಲ್ಪಟ್ಟಿರುವವರು . ಈ ಇಬ್ಬರ ಸಂಕಟವೂ ಒಂದೇ
ಮೂಲದ್ದು—ಮಾನಸಿಕ ಅಸ್ವಸ್ಥತೆ ಮತ್ತು ನಿರ್ಲಕ್ಷ್ಯ. ಆದರೆ ಇಬ್ಬರಿಗೂ ಬೇಕಾದ ಸಹಾಯ ಭಿನ್ನ.
ಚೇತರಿಸಿಕೊಳ್ಳುತ್ತಿರುವ ಮಾನಸಿಕ ಅಸ್ವಸ್ಥರ ಪುನರ್ವಸತಿಗಾಗಿ ಶಿಮೊಗ್ಗದ ಖ್ಯಾತ ಮನೋವೈದ್ಯರಾದ
ದಿ. ಡಾ. ಕೆ.ಎ. ಅಶೋಕ ಪೈ ಅವರು ಕಂಡ ಕನಸು—ಮಾನಸಧಾರ. ಬೀದಿಯಲ್ಲಿ ನಿರಾಶ್ರಿತರಾಗಿ
ತೊಳಲುತ್ತಿರುವ ಮಾನಸಿಕ ಅಸ್ವಸ್ಥರ ರಕ್ಷಣೆಗಾಗಿ ಕರ್ನಾಟಕ ಸರ್ಕಾರ ಹೊಸದಾಗಿ ಆರಂಭಿಸಿದ
ಉಪಕ್ರಮ—ಇಸಿಆರ್ಸಿ (ECRC). ಇದು ಚೆನ್ನೈ ಮೂಲದ ದ ಬಾನಿಯಾನ್ ಎಂಬ ಸಂಸ್ಥೆ ಯೋಚಿಸಿ
ಯೋಜನೆ ಮಾಡಿದ ಕಾರ್ಯಕ್ರಮ.ಇದನ್ನು ಕರ್ನಾಟಕ ಸರಕಾರ ಕೂಡ ಕೆಲವು ngo ಗಳ ಸಹಾಯದಿಂದ
ನಡೆಸುತ್ತಿದೆ.
ದಿ. ಡಾ. ಕೆ.ಎ. ಅಶೋಕ ಪೈ ಅವರು ಶಿಮೊಗ್ಗದಲ್ಲಿ ದಶಕಗಳ ಕಾಲ ಸಮುದಾಯ ಮನೋವೈದ್ಯಕೀಯ
ಸೇವೆ ಸಲ್ಲಿಸಿದ ಧೀಮಂತ ವ್ಯಕ್ತಿ. ಆಸ್ಪತ್ರೆ ಬಿಟ್ಟ ನಂತರ ರೋಗಿ ಒಬ್ಬಂಟಿಯಾಗಿ ಆಗಬಾರದು ಎಂಬ
ಅವರ ತುಡಿತವೇ ಮಾನಸಧಾರದ ಜನ್ಮಕ್ಕೆ ಕಾರಣ. ಅವರ ಆ ದೂರದೃಷ್ಟಿ ಇಂದು ಕರ್ನಾಟಕದ 12
ಜಿಲ್ಲೆಗಳಲ್ಲಿ ಜೀವಂತವಾಗಿ ಕಾರ್ಯನಿರ್ವಹಿಸುತ್ತಿದೆ.
ಮಾನಸಧಾರ: ಆಸ್ಪತ್ರೆ ಮತ್ತು ಮನೆಯ ನಡುವಿನ ಸೇತುವೆ
ಮಾನಸಧಾರ—ಆ ಹೆಸರೇ ಹೇಳುತ್ತದೆ—"ಮನಸ್ಸಿಗೆ ಆಧಾರ." 2014ರಲ್ಲಿ ಮಾಜಿ ಆರೋಗ್ಯ ಸಚಿವರಾದ
ಯು.ಟಿ. ಖಾದರ್ ಮತ್ತು ಮುಖ್ಯಮಂತ್ರಿ ಸಿದ್ದರಾಮಯ್ಯನವರ ನೇತೃತ್ವದಲ್ಲಿ ಪ್ರಾರಂಭವಾದ ಈ
ಯೋಜನೆ, ಆಸ್ಪತ್ರೆ ಚಿಕಿತ್ಸೆಯ ನಂತರ ಚೇತರಿಸಿಕೊಳ್ಳುತ್ತಿರುವ ವ್ಯಕ್ತಿಗಳಿಗೆ ದಿನಪಾಲನಾ ಕೇಂದ್ರಗಳ(
ಡೇ ಕೇರ್ )ಮೂಲಕ ಸಹಾಯ ಒದಗಿಸುತ್ತದೆ.
ಆಸ್ಪತ್ರೆಯಿಂದ ಬಿಡುಗಡೆಯಾದ ನಂತರದ ಅವಧಿಯೇ ಅತ್ಯಂತ ನಾಜೂಕಿನದು. ಏಕಾಂತ,
ಆತ್ಮವಿಶ್ವಾಸದ ಕೊರತೆ, ಉದ್ಯೋಗ ಸಮಸ್ಯೆ, ನೆರೆಯವರ ಕಳಂಕ—ಇವೆಲ್ಲವೂ ಚೇತರಿಕೆಯನ್ನು
ಮಣ್ಣುಪಾಲು ಮಾಡಬಲ್ಲವು. ಮಾನಸಧಾರ ಈ ಅಂತರವನ್ನು ಮುಚ್ಚುತ್ತದೆ.
ಮಾನಸಧಾರ ಏನು ಒದಗಿಸುತ್ತದೆ?
• ಮಾನಸಿಕ ಪುನರ್ವಸತಿ ಮತ್ತು ಜೀವನ ಕೌಶಲ್ಯ ತರಬೇತಿ
• ಉದ್ಯೋಗಪರ ಚಟುವಟಿಕೆ ಮತ್ತು ಸ್ವಾವಲಂಬನೆ ಅಭಿವೃದ್ಧಿ
• ಕೌನ್ಸೆಲಿಂಗ್ ಹಾಗೂ ಸಮಸ್ಯೆ ಇರುವ ವ್ಯಕ್ತಿಗಳ ಬೆಂಬಲ ಗುಂಪು
• ಸರ್ಕಾರಿ ಕಲ್ಯಾಣ ಯೋಜನೆಗಳ ಸಂಪರ್ಕಕ್ಕೆ ಬರಲು ಸಹಾಯ ಮಾಡುವುದು
• ಕುಟುಂಬಗಳಿಗೆ ಮಾರ್ಗದರ್ಶನ—ಹೇಗೆ ರೋಗಿಗಳಿಗೆ ಬೆಂಬಲಿಸಬೇಕು ಎಂಬ ಶಿಕ್ಷಣ
ಇಂದು ರಾಜ್ಯದ 12 ಜಿಲ್ಲೆಗಳಲ್ಲಿ ಮಾನಸಧಾರ ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿವೆ—ಉಡುಪಿ,
ಮೈಸೂರು, ದಾವಣಗೆರೆ, ಧಾರವಾಡ, ತುಮಕೂರು, ಗದಗ, ಕೊಡಗು, ಮಂಡ್ಯ, ಚಿತ್ರದುರ್ಗ, ಕೋಲಾರ,
ಬೆಳಗಾವಿ ಹಾಗೂ ಬೆಂಗಳೂರು ಗ್ರಾಮಾಂತರ. ಇದು ರಾಜ್ಯ ಮಾನಸಿಕ ಆರೋಗ್ಯ ಕಾರ್ಯಕ್ರಮದ
ಭಾಗವಾಗಿ ನಡೆಯುತ್ತಿದ್ದು ಇದನ್ನು ಮಾನಸಿಕ ಆರೋಗ್ಯ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಿರುವ ಸರ್ಕಾರೇತರ
ಸಂಸ್ಥೆಗಳು ನಡೆಸುತ್ತಿವೆ.
ಇಸಿಆರ್ಸಿ: ರಕ್ಷಣೆ, ಚಿಕಿತ್ಸೆ, ಪುನರ್ವಸತಿ
ಮಾನಸಧಾರ ಚೇತರಿಕೆಯ ಹಾದಿಯಲ್ಲಿರುವವರಿಗೆ ಸೇತುವೆ ಆದರೆ, ಇಸಿಆರ್ಸಿ ಕೇಂದ್ರಗಳು ದಡ
ಕಳೆದುಕೊಂಡು ಮುಳುಗುತ್ತಿರುವವರಿಗೆ ಜೀವ ನೌಕೆ ಅಂದರು ತಪ್ಪಾಗಲಾರದು.
2024ರ ಅಕ್ಟೋಬರ್ನಲ್ಲಿ ಬೆಂಗಳೂರಿನ ಸಿ.ವಿ. ರಾಮನ್ ಸರ್ಕಾರಿ ಆಸ್ಪತ್ರೆಯಲ್ಲಿ ಮೊದಲ ಕೇಂದ್ರ
ಪ್ರಾರಂಭವಾಯಿತು. ಇಸಿಆರ್ಸಿ ಎಂದರೆ 24×7 ವಸತಿ ಕೇಂದ್ರ—ಸಂಪೂರ್ಣ ಉಚಿತ. ಸರ್ಕಾರ ಆಸ್ಪತ್ರೆ
ಸ್ಥಳ, ಆಹಾರ, ಔಷಧಿ ಒದಗಿಸುತ್ತದೆ; ಸರ್ಕಾರ ಅಥವಾ ಪಾಲುದಾರರು (ಮಾನಸಿಕ ಆರೋಗ್ಯ ಕ್ಷೇತ್ರದಲ್ಲಿ
ಕೆಲಸ ಮಾಡುತ್ತಿರುವ ಸರ್ಕಾರೇತರ ಸಂಸ್ಥೆಗಳು )
ಮಾನಸಿಕವೈದ್ಯರು,ಮನಶ್ಶಾಸ್ತ್ರಜ್ಞರು ಮನೋಸಾಮಾಜಿಕ ಕಾರ್ಯಕರ್ತರನ್ನು ಶುಶ್ರೂಷಕರನ್ನು
ಒದಗಿಸುತ್ತಾರೆ.
ಇವು ಯಾರಿಗಾಗಿ?
ರೈಲು ನಿಲ್ದಾಣ, ಮಾರುಕಟ್ಟೆ, ರಸ್ತೆ ಬದಿ, ದೇವಾಲಯ ಪ್ರಾಂಗಣಗಳಲ್ಲಿ ಕಂಡುಬರುವ ನಿರಾಶ್ರಿತ
ಮಾನಸಿಕ ಅಸ್ವಸ್ಥರಿಗಾಗಿ—ಗುರುತಿಲ್ಲದ, ಪೋಷಣೆ ಇಲ್ಲದ, ದಿಕ್ಕು ತೋಚದೆ ಅಲೆದಾಡುತ್ತಿರುವ ನಮ್ಮ
ಸಹಮಾನವರಿಗಾಗಿ.
ಇಸಿಆರ್ಸಿ ಒದಗಿಸುವ ಸೇವೆಗಳು
• ತುರ್ತು ಮಾನಸಿಕ ಮೌಲ್ಯಮಾಪನ ಮತ್ತು ಚಿಕಿತ್ಸೆ
• ಪೌಷ್ಟಿಕ ಆಹಾರ, ಬಟ್ಟೆ ಮತ್ತು ಸುರಕ್ಷಿತ ಆಶ್ರಯ
• ಪುನರ್ವಸತಿ ಮತ್ತು ಕೌಶಲ್ಯ ತರಬೇತಿ
• ಕುಟುಂಬ ಪತ್ತೆ ಮತ್ತು ಮರುಸಂಪರ್ಕ
• ಉಚಿತ ಬಿಡುಗಡೆ ಮತ್ತು ತದನಂತರ ಅನುಸರಣ ಸೇವೆ
ಬೆಂಗಳೂರಿನ ಇಸಿಆರ್ಸಿ ಕೇಂದ್ರದಲ್ಲಿ ಚಿಕಿತ್ಸೆ ಪಡೆದವರಲ್ಲಿ ಸ್ಕಿಜೋಫ್ರೆನಿಯಾ, ಬೈಪೋಲಾರ್
ಅಸ್ವಸ್ಥತೆ, ಡಿಮೆನ್ಷಿಯಾ ಮತ್ತು ಖಿನ್ನತೆ ಕಂಡುಬಂದಿದ್ದವು. ಇವೆಲ್ಲವೂ ಚಿಕಿತ್ಸೆಗೆ ಸ್ಪಂದಿಸುವ
ರೋಗಗಳು—ಆದರೆ ಈ ವ್ಯಕ್ತಿಗಳು ಚಿಕಿತ್ಸೆ ಇಲ್ಲದೆ ಬೀದಿಗಳಲ್ಲಿ ಬದುಕುತ್ತಿದ್ದರು.
ಸಂಖ್ಯೆಗಳು ಹೇಳುವ ಕಥೆ
• ಕೆಲವೇ ತಿಂಗಳಲ್ಲಿ 500ಕ್ಕೂ ಹೆಚ್ಚು ವ್ಯಕ್ತಿಗಳನ್ನು ರಕ್ಷಿಸಲಾಗಿದೆ
• 154 ಮಂದಿಗೆ ಪೂರ್ಣ ಚಿಕಿತ್ಸೆ ಮತ್ತು ಪುನರ್ವಸತಿ ನೀಡಲಾಗಿದೆ
• 116 ಮಂದಿ ಕುಟುಂಬದೊಂದಿಗೆ ಮರು ಸೇರ್ಪಡೆಯಾಗಿದ್ದಾರೆ
• ಉಡುಪಿ, ಬೆಂಗಳೂರು, ಗದಗ, ಯಾದಗಿರಿಯಲ್ಲಿ ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿವೆ
• 2026ರ ಏಪ್ರಿಲ್ನಲ್ಲಿ ಮೈಸೂರಿನ ಕೆ.ಆರ್. ಆಸ್ಪತ್ರೆಯಲ್ಲಿ 30 ಹಾಸಿಗೆಗಳ ಹೊಸ ಕೇಂದ್ರ
ಉದ್ಘಾಟನೆ
• 27 ಜಿಲ್ಲೆಗಳಿಗೆ ವಿಸ್ತರಿಸಲು ಯೋಜನೆ
ಹೆಮ್ಮೆಯ ವಿಷಯವೆಂದರೆ, ಉಡುಪಿಯ ecrc ಕೇಂದ್ರವನ್ನು ಎ.ವಿ. ಬಾಳಿಗ ಸ್ಮಾರಕ ಆಸ್ಪತ್ರೆ
ನಿರ್ವಹಿಸುತ್ತಿದೆ. ಈ ಕೇಂದ್ರ ಜಿಲ್ಲಾ ಆಸ್ಪತ್ರೆ, ಅಜ್ಜರ ಕಾಡು , ಉಡುಪಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದು,
ಸಂಪರ್ಕಕ್ಕಾಗಿ: 7795978883 — ಕರಾವಳಿ ಕರ್ನಾಟಕದ ಮಾನಸಿಕ ಆರೋಗ್ಯ ಸೇವೆಯ ಒಂದು
ಮಹತ್ವದ ಹೆಜ್ಜೆ.
ಒಬ್ಬ ಮನೋವೈದ್ಯನ ಮಾತು
22 ವರ್ಷಗಳ ಕಾಲ ಕರಾವಳಿ ಕರ್ನಾಟಕದಾದ್ಯಂತ ಮಾಸಿಕ ಉಚಿತ ಮಾನಸಿಕ ಆರೋಗ್ಯ
ಶಿಬಿರಗಳನ್ನು ನಡೆಸುತ್ತಾ, ದೇವಸ್ಥಾನದ ಅಂಗಳದಲ್ಲಿ, ಶಾಲಾ ಹಾಲ್ಗಳಲ್ಲಿ, ಗ್ರಾಮ ಪಂಚಾಯತ್
ಕೊಠಡಿಗಳಲ್ಲಿ ಕೂತು ರೋಗಿಗಳನ್ನು ನೋಡಿದ್ದೇನೆ. ಒಂದೇ ಒಂದು ಭೇಟಿ, ಒಂದೇ ತಿಂಗಳ
ಔಷಧಿ—ಇವು ವರ್ಷಗಳ ಕಾಲ ಕದ್ದ ಜೀವನವನ್ನು ಮರಳಿ ತರಬಲ್ಲವು.
ನಮ್ಮ ಸಮಾಜದಲ್ಲಿ ಮಾನಸಿಕ ಅಸ್ವಸ್ಥತೆ ಇಂದಿಗೂ ಕಳಂಕ ಹೊತ್ತಿದೆ. ಕುಟುಂಬಗಳು ನಾಚಿಕೆಯಿಂದ
ಮುಚ್ಚಿಡುತ್ತಾರೆ. ರೋಗಿಗಳು ಮೌನವಾಗಿ ನರಳುತ್ತಾರೆ. ಕುಟುಂಬವಿಲ್ಲದವರು ಮಾಯವಾಗುತ್ತಾರೆ.
ಮಾನಸಧಾರ ಮತ್ತು ಇಸಿಆರ್ಸಿ—ಇವೆರಡೂ ಸರ್ಕಾರ ಸ್ಪಷ್ಟವಾಗಿ ಹೇಳುತ್ತಿರುವ ಮಾತು: "ಪ್ರತಿ
ಜೀವಿಗೂ ಮೌಲ್ಯ ಇದೆ."
ಈ ಎರಡು ಯೋಜನೆಗಳು ಕಡೆಯ ದಶಕಗಳಲ್ಲಿ ಸರ್ಕಾರ ತೆಗೆದ ಅತ್ಯಂತ ಮಾನವೀಯ ಹೆಜ್ಜೆಗಳಲ್ಲಿ
ಒಂದಾಗಿವೆ.
ತಿಳಿಯಿರಿ. ತಿಳಿಸಿರಿ. ಸಹಾಯ ಮಾಡಿ.
ಬೀದಿಯಲ್ಲಿ ಮಾನಸಿಕ ಅಸ್ವಸ್ಥತೆಯಲ್ಲಿರುವ ವ್ಯಕ್ತಿಯನ್ನು ಕಂಡಾಗ ನಿರ್ಲಕ್ಷಿಸಬೇಡಿ. ಸಮೀಪದ ಜಿಲ್ಲಾ
ಆಸ್ಪತ್ರೆ ಅಥವಾ ಜಿಲ್ಲಾ ಮಾನಸಿಕ ಆರೋಗ್ಯ ಕಾರ್ಯಕ್ರಮ (DMHP) ಕಚೇರಿಯನ್ನು ಸಂಪರ್ಕಿಸಿ. ಅಥವಾ
ರಾಷ್ಟ್ರೀಯ ಮಾನಸಿಕ ಆರೋಗ್ಯ ಸಹಾಯವಾಣಿಗೆ ಕರೆ ಮಾಡಿ:
ಟೆಲಿ ಮನಾಸ್ ಸಹಾಯವಾಣಿ: 14416 (ನಿಃಶುಲ್ಕ | 24×7)
ಉಡುಪಿ ಜಿಲ್ಲೆಯಲ್ಲಿ ನೀವು ಸಂಪರ್ಕಿಸ ಬೇಕಾದ ಸಂಖ್ಯೆ 7795978883
